Muqdisho(SONNA)—Gudoomiyaha Gobolka Banaadir ahna Duqa Magaalada Muqdisho Yuusuf Xuseen Jimcaale ayaa shalay xariga ka jaray dib u furista Masjidka qadiimi ah ee Arbaca Rukun ee Degmada Xamarweyne.
Masjidka Arbaca Rukun oo ah Masjid Qadiimi ah oo dhisan muddo 771 sanno ah yuu Guddoomiyaha Gobalka Banaadir ahna Duqa Magaalada Muqdisho Yuusuf Xuseen Jimcaale Madaale iyo Safiirka Dowladda Turkiga u fadhiya Soomaaliya Olgan Beeker ka qeybgaleen dib u howlgalinta Masjidkaasi, kaasi oo bur-bursanaa muddo ku dhow rubac qarni, waxaana hirgalinta dib u dayactirkiisa iska kaashaday Maamulka Gobalka Banaadir iyo Dowladda Turkiga, iytadoo munaaasabadda xariga looga jaraayay ka soo qeybgalay Madax ka tirsan Wasaaradda Awqaafta, iyo arrimaha Diinta, culumaa’udiin iyo qeybaha Kala duwan ee Bulshada.
Xoghayaha Joogtada ah ee Wasaarada Diinta iyo Awqaafta Maxamed Kheyre Adan ayaa u mahadceliyay intii ka qeyb qaatay dib u dayactirka Masjikaasi ,kaasi oo ah mid taariikhi ah, islamarkana dhisnaa in ku dhow kun sano.
Safiirka Turkiga u fadhiya Soomaaliya Olgan Beeker ayaa waxa uu ka sheekeeyay taariikhda Masjika Arbaca Rukun, isagoo xusay in ay muujineyso sida ummada Soomaaliyeed ay ugu xooggan tahay Diinta Islaamka.
Comments
Post a Comment